कृतज्ञतेसह यशस्वी करिअर संक्रमण

काहीतरी करायला पाहिजे म्हणून हे काम करूया किंवा टाईमपास म्हणून आपण एखाद्या कंपनीत रुजू होत नसतो तर उज्ज्वल भविष्याची स्वप्ने पाहत शक्य तेवढी मेहनत करून हवे ते मिळविण्यासाठी आपण धडपडत असतो. नव्याच्या नवलाईत एक प्रकारचा उत्साह त्यावेळी ओसंडून वाहत असतो पण नेहमी ठरवल्याप्रमाणेच गोष्टी आपल्या आयुष्यात घडतात असेही नसते. जेवढी शक्य असेल तेवढ्या प्रगतीच्या शिखरावर आपण पोहोचलेलो असतो आणि त्यापुढे कोणतीही वाढ अशक्य असल्याने शेवटी त्या कंपनीला सोडून जाण्याच्या निर्णयाप्रत आम्ही येऊन पोहोचतो.

बर्‍याच वेळा आपल्याला नोकरी बदलण्याच्या परिस्थितीचा सामना करावा लागतो परंतु समोर दिसणाऱ्या आश्वासक भविष्यासाठी कोणालाही दुखावल्याशिवाय करिअरमधील संक्रमण यशस्वीपणे कसे हाताळायचे याबद्दल अनेकदा गोंधळ होतो. ते करिअर संक्रमण सहजतेने हाताळण्यासाठी लाइफ कोच आणि बिझनेस मेंटॉर शैलेश तांडेल यांचा ब्लॉग, ’यशस्वी करिअर संक्रमण’.

नोकरी सोडताना भावना भरून आल्याने मनात विचारांचे काहूर माजलेले असते आणि त्याचबरोबरीने काम सोडणे कसे योग्य आहे याची साधार आणि सबळ कारणे देखील मनात घोंघावत असतात. जसे की, आता जे काम करत आहोत त्यापेक्षा चांगली संधी मिळणे, कामाच्या ठिकाणी वातावरण योग्य नसणे, बॉससोबत समस्या, वैयक्तिक वाढीची पुढे काहीही शक्य नसल्याने एकाच जागी अडकल्यासारखे वाटणे किंवा नकारात्मक आणि सहकार्याचा अभाव असलेले वातावरण अनुभवणे वगैरे वगैरे कारणांचा यात समावेश असू शकतो. आणि तसेही आम्ही जिथे काम करत आहोत त्या कंपनीला दोष देणे स्वाभाविकच आहे, नाही का?

बर्‍याचदा, जेव्हा काम सोडण्याची वेळ येते, तेव्हा आमचे लक्ष बहुदा बायोडेटा अद्यावत करण्यात किंवा नवीन संधी शोधण्यासारख्या व्यावहारिक बाबींकडे वळते. पण हे आमच्या ध्यानीमनीही नसते की कृतज्ञतापूर्वक प्रस्थान केल्याने वैयक्तिक वाढीवर खूप मोठा परिणाम होऊन आश्वासक भविष्यासाठी मार्ग मोकळा होऊ शकतो. एका नोकरीतून दुसऱ्या नोकरीत जाताना ते करिअरचे संक्रमण यशस्वीरीत्या कशाप्रकारे पार पाडले जाऊ शकते आणि त्या संक्रमणात कृतज्ञता कशी मोलाची भूमिका बजावू शकते याची जाणीव कित्येकदा आपल्याला नसते. त्यामुळेच त्यासाठी महत्वाची ठरणारी कृती व कोणती पावले उचलणे गरजेचे आहे, याचा तर साधा विचारही आमच्या मनाला शिवलेला नसतो.

एका नोकरीतून दुस-या नोकरीत रुजू होतानाचा वेळ वैयक्तिक वाढ आणि आत्म-चिंतनासाठी एक अद्वितीय संधी असते. या कालावधीत कृतज्ञतेचे भाव जर मनात असतील तर गेल्या काही वर्षांतील तुमच्या वैयक्तिक आणि व्यावसायिक विकासाचे मूल्यांकन तुम्ही करू शकाल. भूतकाळातील अनुभव आणि संधींबद्दल कृतज्ञता व्यक्त केल्याने सकारात्मक मानसिकता विकसित होते आणि आतापर्यंतच्या आपल्या प्रवासाचा सखोल माहितीपट पुन्हा एकदा आपल्या नजरेसमोरून जातो. ज्यामुळे आपण नक्की किती प्रगती केली आहे याची जाणीव आपल्याला होते.

आपले सहकारी, हाताखालील माणसे आणि वरिष्ठांप्रती कृतज्ञता दाखवणे केवळ विद्यमान नाते मजबूत करत नाही तर व्यावसायिक नेटवर्कमध्ये सकारात्मक प्रतिष्ठा राखण्यास देखील मदत करते. या गोष्टीची कायम जाणीव असणे गरजेचे असते की आपण ज्यांच्यासोबत काम केले आहे ते जिवंत हाडामासाची माणसे आहेत आणि त्यांनाही भावना असतात. आणि जशा काही आठवणी तुमच्या मनावर बिम्बलेल्या आहेत तशाच काही आठवणी त्यांच्याही असणारच. त्यामुळे काम सोडून जाताना अशा सामायिक आठवणींना कृतज्ञतेने उजाळा दिल्याने त्या पुन्हा एकदा जिवंत होतात आणि लोकांच्या मनात त्यांचा कायमचा ठसा उमटतो.

आभार मानण्यासाठी किंवा एखाद्याचे कौतुक करण्यासाठी ग्रीटिंग कार्ड पाठवण्याची पारंपारिक पद्धत आता लोप पावली आहे पण तरीही, मनापासून निरोपाचा मजकूर लिहिणे अजूनही आश्चर्यकारक परिणाम साधू शकतो. तुमच्या कार्यकाळात तुम्हाला मिळालेला पाठिंबा, सहकार्य, मार्गदर्शन आणि संधींबद्दल कृतज्ञता व्यक्त करून तुमच्या भावना व्यक्त करणारा एक प्रामाणिक संदेश तयार करून ईमेल अथवा WhatsApp द्वारे पाठवणे चालू शकतं, परंतु हस्तलिखित संदेश मनाला भावतो कारण त्यात वैयक्तिक भावनांचा स्पर्श असतो आणि एक आपलेपणा जाणवतो.

तुमचे मनोगत एखाद्या व्यक्तीसमोर प्रत्यक्षात व्यक्त करणे सर्वोत्तम. त्यामुळे शक्य असल्यास, तुमची कृतज्ञता समोरासमोर व्यक्त करण्यासाठी एक वेळ ठरवून तुमचे सहकारी, अधीनस्थ म्हणजे तुच्या हाताखाली काम करणारे (subordinates) आणि वरिष्ठांशी वैयक्तिक भेट घ्या. या वैयक्तिक स्पर्शाचा प्रभाव कायमस्वरूपी राहतो आणि तुम्ही निर्माण केलेले व जपलेले बंध अधिक मजबूत करतो.

तुम्ही जिथे जात आहात तिथेच कायमस्वरूपी राहून तुम्ही निवृत्ती घ्याल असं कदाचित होऊ शकतं पण शक्यता ही देखील असेल की अधिक चांगल्या भविष्यासाठी तुम्ही पुन्हा एकदा नोकरी बदलाल आणि सतत विकसित होत असलेल्या या कॉर्पोरेट जगामध्ये, भविष्यात, तुम्हाला अतिरिक्त फायद्यांसह आणि उच्च स्थानासह पुन्हा याच कंपनीत सामील होण्याची संधी मिळण्याची शक्यता नाकारता येत नाही. अशा परिस्थितीत तुम्ही नोकरी सोडताना व्यक्त केलेली कृतज्ञता महत्त्वपूर्ण भूमिका बजावू शकते आणि आता केलेल्या त्या कौतुकांचे क्षण तुम्हाला भविष्यात खूप मोठे बक्षिस मिळवून देऊ शकतात.

कृतज्ञतापूर्वक काम सोडणे हे केवळ मानवी नातेसंबंधांबद्दल नाही; तुम्ही ज्या कंपनीतून बाहेर पडण्याची योजना आखत आहात त्या कंपनीत असताना तुम्हाला मिळालेले अनुभव आणि धडे याबद्दल देखील आहे. पुढे जाण्यापूर्वी, वैयक्तिकरित्या आणि व्यावसायिकरित्या शिकलेल्या धड्यांवर विचार करण्यासाठी वेळ काढा. हे आत्म-चिंतन भविष्यातील निर्णयांना आकार देण्यासाठी अत्यंत मोलाचे ठरतात.

कृतज्ञतापूर्वक कार्यस्थळ सोडताना, शेवटपर्यंत आपण दिलेला शब्द आणि जबाबदाऱ्या पूर्ण करणे आवश्यक असते. तुमच्या सध्याच्या टीमसाठी आणि संपूर्ण संस्थेसाठी एक सुरळीत संक्रमण सुनिश्चित करून, तुमच्या जबाबदाऱ्या व त्याबद्दलचे योग्य ते ज्ञान तुमच्या टीमला द्यायला सुरुवात करा आणि त्याचबरोबरीने जो तुमच्या बदली नवीन रुजू होणार त्याला प्रशिक्षण देण्यात सक्रिय व्हा. तुमची ही कृती व्यावसायिकता आणि त्याचबरोबरीने तुम्हाला मिळालेल्या संधींबद्दल तुमची कृतज्ञता दर्शवते.

तुमची सध्याची नोकरी कृतज्ञ भावनेने सोडल्यानंतर, सकारात्मक दृष्टिकोनासह नवीन संधी स्वीकारण्यास सज्ज व्हा. तुमची कौशल्ये, स्वारस्ये आणि आकांक्षा यांचे मूल्यांकन करण्यासाठी वेळ काढा. तुमच्या ध्येयांशी जुळणारे विविध उद्योग किंवा भूमिकांचे संशोधन करा आणि संभाव्य करिअरच्या संधी पडताळून पहा. हे सर्व करण्यात तुमची नेटवर्किंग क्षमता आणि माहितीपूर्ण मुलाखती जाणीवपूर्वक आकलन करून नवीन नाती जोडण्यात उपयोगी पडू शकतात.

यशस्वी आणि आश्वासक भविष्यासाठी कृतज्ञतेला जीवनाचा भाग बनवायला शिकून घ्या. नवीन सुरुवात करताना कृतज्ञतेची भावना कायम तुमच्यासोबत असणे गरजेचे आहे. तुमच्या मागील नोकरीतून शिकलेल्या धड्यांना दाद देऊन त्यांचा वैयक्तिक आणि व्यावसायिक वाढीसाठी पाया म्हणून वापर करा. कृतज्ञता आणि लवचिकतेच्या मानसिकतेसह नवीन आव्हानांना सामोरे जा. आतापर्यंतच्या तुमच्या अनुभवांनी तुम्हाला या पुढील धड्यासाठी तयार केले आहे हे जाणून, पुढे असलेल्या संधींचा स्वीकार करा.

शेवटी, कृतज्ञतापूर्वक कार्यस्थळ सोडणे म्हणजे केवळ निरोप घेणे नाही. तुमच्या आतापर्यंतच्या करिअरच्या प्रवासाचा एक अध्याय कौतुकाने पूर्ण करण्याची आणि यशस्वीरीत्या आश्वासक भविष्याचा मार्ग प्रशस्त करण्याची ही संधी आहे. तुमच्या अनुभवांवर चिंतन करून, सहकारी आणि वरिष्ठांप्रती कृतज्ञता व्यक्त करून, सचोटीने संक्रमण करून आणि नवीन संधींचा स्वीकार करून, तुम्ही यशस्वीरीत्या सकारात्मक आणि परिणामकारक संक्रमण सुनिश्चित करू शकता.

लक्षात ठेवा, कृतज्ञता हे एक शक्तिशाली साधन आहे जे नवीन शक्यतांचे दरवाजे उघडू शकते आणि वैयक्तिक वाढीस चालना देऊ शकते. फारच कमी लोक कृतज्ञतेने त्यांचे विद्यमान नोकरी सोडतात परंतु जेव्हा ते करतात तेव्हा त्यांच्याकडे पूर्णत्वास नेणारे असे आश्वासक भविष्य असते.

Blog by ‘Life Coach and Business Mentor’ Shailesh Tandel

Same Blog in English: Successful Career Transition>>>